有日阿媽話：「我好似妳呢個年紀結咗婚，仲有咗妳哥哥。」讀書果陣同三個好姊妹，成日估第時邊個最快嫁得出，眨下眼兩個做咗人妻，一個仔都生埋。當日嘅阿妹到依家俾小朋友叫姨姨，歲月不饒人，除咗多咗幾分老態，心態亦隨之成熟，不過我幾鍾意現階段嘅自己。
返全職後生活比以前穩定，事業同愛情都叫過得去，自由身咗一段日子，突然戶口個個月都有糧出個感覺好正，朋友話我終於都上岸。未結婚有未結婚嘅好，單身先有空間任我行，呢幾年行過咁多路，發覺太規範嘅生活並唔係自己最嚮往。
結婚唔係為個名分、為張婚書、為個婚禮，要結而結，去到呢個年紀，太多花巧還不如簡簡單單。如果有個人準備好一套機票、一間靚酒店、一個稱心滿意嘅旅程同自己求婚，再即刻起程去鍾意嘅目的地註冊同honeymoon，拖住手一邊旅行一邊自己影婚照，對我嚟講呢份驚喜比鑽戒有幾卡重、擺幾圍酒更浪漫。
兩個人喺埋一齊有好多嘢需要磨合，想一齊生活，大前提係要有地方住。畢業之後我揀咗邊儲錢邊旅行，因為我知道無論幾多年，做我呢行嘅收入，慳慳埋埋都唔夠我買層樓，與其做樓奴，不如趁後生睇多啲呢個世界，自由無價。
嚟到二字頭最後一年，出走唔再只係貪新鮮，旅行無非想行開抖抖氣。呢一年除咗努力打工儲錢，亦希望三十歲前可以做一件瘋狂事！
#生日快樂
Search